النظام

أنا اعرف عيون ..تخاف الظلام !
وباعرف قلوب ..تخاف الغرام!!
لكن فى بلادنا...نظامنا يحاول,
يعلم ولادنا ...يخافوا الكلام!!!!
لكن مهما حاولوا.,مجرد محاولة!!
دالو لفوا فينا... يموتوا فى جولة..
ومهما يطوّل ظلم النظام دا ...........
مسيرنا نأسّس للعدل دولة .
هبة بلال

رسالة للمجلس العسكرى

عللّى فى سجنى... وحطنى ورا ألف سور.. مش من حديد!
اسجن خيالى ف-قمقمك ,وارميه...بعيد
احكم قيودك عاللّى فاضل من سنين عمرى الزهيد
امنعنى احس بأنى نفسى انى احلم......من جديد
اقفل شبابيك الأمل ,واكسر دماغ حلمى العنيد....
اكسر جناح طيرى اللّى ساجنه جوا منّى,لينطلق ويروح ...بعيد
يا صاحب العقل الرشيد,
حاسب عشان فى ضوء بسيط جاى من هناك..
روح موتّه ....اعفى عليه..خليك شديد
اقتل بايدك بسمتى..وامحى ملامح فرحتى ...
من قلب عاش يحلم.... بعيد
قلبى اللى شال الحب فيه..ما بيتهزمشى من عبيد!!
شوف قلب تانى تهزمه ....،يا صاحب القلب الحديد!
وابقى استفز الصبر فينا  من جديد.
هبه بلال

العسكرى

يا عسكرى ياللى هناك ......كانت حياتنا زمان فداك.
كنا نشيلك عالكتاف.... والكل يهتف للبطل أجدع هتاف.
لكن ايديك ........غرقت خلاص فى دمنا والكل شاف.
يا عسكرى ياللى هناك... مابقتش فى عنيا الملاك!!!
يا عسكرى كنا نشيلك عالرؤوس ...
دوس عاللى فاضل منى دوس
دوس عالقلوب الطاهره دى بضغطة زناد,
واحرق قلوبنا عاللى فاضل م الولاد,
سلم على وشوشنا بايديك.. علشان نطيع..
عرينا قدام الجميع..........?!!!!!!!!!!!
دوس عالوشوش الطيبة دى بالمداس ....
يا عسكرى الكل زيك ابن ناس
يا ابو السلاح ميرى جبان.,... ما اقدرش أقول يا عسكرى والله زمان
كان السلاح دازمان بيحمى ارضنا ....
دلوقتى بيبات الرصاص فى قلبنا!!!
مين علمك ..تقطف ورودنا م-العيدان??
مين علمك.. تقتل شبابنا فى الميدان??
يا عسكرى مش برضه كنا اخوات زمان؟؟؟؟!!
                                                        هبة بلال