ملامحك فين

كانت واقفة
لمحت عينيها بالصدفة
عيون باردة
ملامح وشها جامدة
خدود دبلت
شفاه قبلت تعيش جاحده
تحب الأنس بالوحدة
وتبعد عن ضيا البسمة 
فمديت خطوة انا ليها
حَضَنْتْ ايديا بإيديها
وسلمنا لأول مرة بعد سنين
لادى روحها
ولا لاقى ملامحها
مانيش لاقى سوى صورة بتشبهها
 ومش عارف بكلم مين
فقلت انا بس عندى سؤال
"ملامحك فين؟"
هبة بلال  :(
 

حبك دروب

حبك دروب
والقلب حارب فى سبيلك 
حتى مل من الحروب
واتخضبت كل الطرق
بدم روحه وانتشت
فجأه لقى الأحلام مشت
وعششت كل الحاجات المفزعه
ولمح فى لحظه كل آثار الندوب
معلمه فى الروح أوى
زهد المعارك وقتها
قرر يتوب  ويعيش سوى
كره الهزيمة والانكسار
رافض يعيش لجلك
محارب عمره ما شاف انتصار.
:( هبه
 

مطر

آه بعترف
لمعة عينيكى فى المطر شئ مختلف
باينه مرايات
فيها أشوف عمرى اللى جاى وانسى اللى فات
وانظر ملامحك فى سكات
ألقى المطر
لؤلؤ منتور عالجبين واتأملك
كل الوجود صاخب ووحدك منصته
للحن حبات المطر بين الإيدين
ولضمته خدودك وشعرك والرموش
وانا قلبى مش قادر يحوش
عقد انفرط من كتر شوقه لضمتك
قتله الحنين
وامتد فوق الشعر تاج
وشعرك المفرود يطير
ألقى ساعتها القلب هاج
وابدأ أغير 
من كتر حبك للشتا .
:)

حنين

يادى الحنين
واخدنى من أيامى فين؟
قلبى ما عادشى يحتمل دقات جداد
بطل عناد
لملم متاعك وافرد الجناحات وطير
وابعد قوى عنى وعن قلبى الفقير
زيد البعاد
يادى الحنين انسى اللى فات
واخدنى ليه للذكريات
ما بقتش قادره حتى أبدأ من جديد
وكل ما أتملكه حبة فتات
من روح هزيلة 
وقلب تقدر توصفه بإنه مات .
 :( هبة

ورقة شجر

ورقة شجر جانى الخريف بدرى
خدنى الهوا لهنا وهناك أجرى
واما داستنى اقدام كتيره بكيت 
كان بس ايه طلعنى من جدرى
ورقة شجرفايته غصون الدار
شاحبه الملامح بعد زين وخضار
يا هلترى حضن الشجر هيجود
ولا الغصون راح تقبل الأعذار؟
كل الورق مجبر على أمره
ربه خلق روحه وكتب عمره
اختار بإيده طلته الزاهية
ولا انكتب برضاه يطول سفره
يادى الهوي يا مفرق الأوراق
ما بيبقى منها غير يا دوب أسماء
ذكرى تفوت عالبال فى كل خريف
ومشبحاها لمسه م الأشواق
يا فصل بيفرق خطوط عمرى
كل الشجر رافض تكون قبرى
ماسك زمامى والهوا ساعدك
قادر وانا مغلوب على أمرى