قصاص

عَينٌ تَدْمَعْ..
أبٌ مُتَغَيبُ لا يرجَعْ..  
نظْراتُ حَيرى زائِغَةٌ.. 
أذنٌ سامِعَةٌ لا تَسْمَعْ ..
قَلْبٌ مَكْلومٌ يتَأوَه..
احساسٌ نابض يتألم..
ولسانٌ مُنْعَقِدٌ حُزناً
وخطى ً واثقَة تتقَدّم
أمٌ تتوسلُ صارِخة
ارجعْ يا ولدى كى تَسْلَمْ
والعقلُ يُرَدِدْ لن أرجَعَ
فالدَمُ الحُرُ لا يَنْضِبُ الا بالْدَمْ.:(
هبة بلال       

حسرة

يا قلب كافر غبى بتحركك غولة
      سمعاً وطاعة وزيف..
        والقتل بالتكليف
العقل فيك مغلول ..والفكرة مشلولة

يا يد كل يزيد بالدم معجونة
     كُفّى عن التحريف.. 
      الدم اهوه عالسيف..
دم الحسين لعنة.. واليد ملعونة

يا قلوب ما تعرف خوف ف-الشدّة موجودة
  ضهر الوطن مكشوف واليد ممدودة
  الصبح جاى جميل مهما يطول الليل
   مهما الخسيس يفترى أيامه معدودة .
هبة بلال. 

ما تنخيّش

دمانا السايلة عاللأعتاب
بتسألنى عن الأصحاب لسانى ينعقد منى..
ألاقى الدمعة ف_عنيكى تكفّن طلّة الننى..
وصوت القلب بينهنه من الحسرة
ما هيش أول ولا آخر دما سالت عشان ألقاكى منكسرة
ماهيش أول ولا آخر عيون تتفض
ولا أول ولا آخرايدين تسحل ولاد عالأرض.!!
ماهوش أول ولا آخر جبان يقمع..
ولا أول ولا آخر صراخ يطلع..
فما تنخيّش..
ألوف ماتت عشان النبض فيكى يعيش
أمانة بس لمينا وضمينا أكيد احنا ببعض أقوى
معاكى وبيكى نستقوى على كل الضلال والغدر
 أمانة عليكى ترقينا وتدعيلنا فى صلاة الفجر :(.
هبة بلال.  

ناضل

يا دايق المُرين والصبر والحنضل
اوعاك تبات مقهور قوم للنضال أفضل
قوم للنضال أولى..
الظلم والجبروت مايموتش من جولة
افتح عينيك للضى الضى ما بيعميش
لو حتى جالك حى من بلطجى وشاويش
ازعق فى بكرة الجاى قوم حارب الخفافيش
صحى عيون الفجر.. افتح بيبان النور
عمرك يدوب فكره والحر طبعه يثور
قدم ايديك بالمدد.. ما نتاش كمالة عدد
دا انت العرين والأسد وانت اللى بيك مغدور.
هبة بلال 

ماله حالك

ماله حالك؟
لسه ابنك فيكى هالك لسه ناسك كالعبيد
لسه أصحاب الممالك ملكهم عمال يزيد
سلسلوا فيكى الجدايل تانى بالنار والحديد!!
خلوا بحر الدم سايل غرق التوب الجديد!!
 دم طاهرما ابتغاشى خيلة كدابة ومظاهر
 دم شاب ودم شابة خلوا كل الناس تشيب
دم شيخ نازل مظاهرة.. دم مينا عالصليب
فى النهاية الدم مصرى لجل ما جرحك يطيب.
هبة بلال.

أولاد الشوارع

مسجون فى توب مش توبى ما اعرف ذنب مين
وحقيقتى تايهة وسط ضعفى من سنين
يمكن أكون انسان بسيط
يمكن فقير أو حتى ممكن اكون لقيط
يمكن على أعتاب حياتكم التقيت نفسى وحيد
بس الأكيد....
 انى ابقى واحد منكم
مش بلطجى..........
 ولا ابن شارع زى ما قال بعضكم
 أنا مش بهدد أمنكم..
ما وصلتش الدنيا دى غاصب أو بخون
سيبتونى ليه منكم أضيع
وجنيتوا عالأمل اللى كان جوا العيون؟
أنا قلبى طفل بتقتلوه..
حلمى البسيط من ظلمكم عمال يتوه
وبرغم كل الامتهان أنا لسه بحلم بالأمان
 واتسول البسمة البريئة من شفايف قلبكم
مش بلطجى ومش بهدد أمنكم
بس الأكيد انى ضحية صمتكم. :((
هبة بلال

وانا وياه (ل-هبة بلال)

وانا وياه بحس بشوقى يسبقنى ويوصل ليه:)

والاقى عيونى بتسافر وبتتوه منى ف-عيونه

وبتشوفنى وانا ساكنه ف-حضن عينيه

وقلبى عنده بيهاجر بأشواقه يطوف حواليه

وايدى جوا حضن ايديه وقلبه بشوقه يحضنى

ونبقى -فى أمان الله- أبص القاه يتوه منى !!

ويغرق جوا أفكاره يفوت لى القلب فى ناره

أتوه انا منه ف-ظنونى ...

ينبّت شكى فى قلبى ويقتل شوقى وجنونى 

واقول يا هلترى فكره فى مين دلوقت؟

مع بكره؟؟؟ مع الذكرى؟؟

وبين حزنى وبين ظنى يفوت الوقت

وتيجى ف-بالى ميت قصة

وافوق من ظنى اندهله يكون لسه

خياله فى اللى مش عارفاه والقى فكره منى تاه

فاخاف ينسى ان انا وياه فاندهله ما يسمعنيش!!

وفكره فى الخيال بيعيش

فانده تانى....والقى عيونه تتلفت الى عيونى

فيتبسّم ...ويتنسّم عبير غيرتى من الفكرة 

وخوفى يكون مع الذكرى..

فاعاتبه عاللى كان منه ولما اقول سرحت فى ايه

يقول ليا...(فردت العمر قدامى ..رسمتك كل احلامى)

(فى صفحة من صفح عمرى رسمت عنيكى فى صورة)

(كتبتك فيها اسطورة رفعتك راية منصورة)

(بنيت لك مملكة بالورد بتحضن قلبنا بلهفه فى عز البرد)

(وقلبى البكر زينته لتاج العرش)

(فسامحينى بسيطة هديتى وعالقد لكن حبى ما يتقدرش)

ويتبسم ويهمس لى (أنا عاشقك يا مجنونة:))

فاتبسم واتنسم عبير شوقه وايدى لسه واخدها ف-حضن ايديه

وعينى تعود له من تانى تتوه فى عنيه

تشوفنى جوا حضن عنيه...

وقلبه بشوقه يحضنى فأهمس له ....

وانا عاشقاك فما تتوهشى كتير منى؟

هبة بلال

(:

الموجة (ل-هبة بلال)

الموجة جوا البحر
(اللى ملان أمواج توصل كما الحجاج واحده ورا واحده)
تقطع كتير مسافات 
علشان تشوف الشط .. 
وتحس أحضانه!!
أول ما توصل ليه تصبح كتير أهدى!!
يحضنها لحظة بشوق ..ويردها تانى
تصرخ تقول يا بشر..
من بعد طول السفر الهجر أعيانى
وبرغم كون الشط ما وفاش ولا مرة
بتلملم اللى فاض من ضمته ليها وتعاود الكرّة.
هبة بلال

استفت قلبك (بقلم هبة بلال)

استفتِ قلبك بين باطل وبين قاتل
بين اللى بيكفرك بين اللى بيماطل
  استفتى آلامك..ورقك وأقلامك 
لو بعت أحلامك راح يبقى ايه فاضل

 استفتِ قلب شهيد فى مجلس الوزرا
كان صلى فى السيدة أو صلى للعدرا
  استفتِ ماسبيرو واللى فدى غيره
وابو الشهيد اللى فارق من الحسرة

استفتِ قلب جميع السجنا فى الحربي
  استفتِ قلب حزين شايل ومتعبي
 استفتِ مكلومة  صابرة ومحرومة
 م_القهر مهزومة والجانى مستغبي

    استفتِ كل نهار يتمنى يوم يطلع
 اما ضياه يتسجن أو ليل غميق يرجع 
يجي الجواب صرخة من كل قلب عليل
 تشق ظلم الليل.....والكل راح يسمع
من بعد ظلم وويل...  الفجر راح يطلع.
هبة بلال

الدم (بقلم هبة بلال)

يا دمْ ياسايلْ على الأسفلتْ...ذنبك فى رقبة مين؟
صوتنا عويل وانت....صوتك جراح وأنينْ...
بص ف-عينيا وشوف... يمكن تلاقينى..خارج عن المألوف..
فتش فى أفكارى ........جايز أنا اللى قتلت...

يا دم متفرق على المجاميع...أول ما دق الجرس..
الكل قام باعك... للبلطجة ....والحرس...
مهما تبان مظلوم...او تشكى أوجاعك...
باعوك قليلّى الذمَمْ .....لحبة المقاطيع....

يا دم ياللى أمانة ف-رقبتى...حقك أجيبه منين..؟
من  اخونا ابو بيادة...وشريطة عالكتفين؟...
ولاّ من الدراويش؟ولاّمن النخبة؟ ولا قيادة الجيش؟
ولاّهاعيش بعدك متنكسة رايتى؟؟؟

يا دم يا نازل كما الشلال...اصرخ بعلو الصوت..
قول ما بهاب الخوف... ولا كلمتى تخرج مرعوشة..ناقصة حروف..
نيل الشهادة ولا... الحكم بالأغلال...

 يا دم يا معلّم على الحيطان...قلب الوطن مكسور...
يا هلترى بكره راجع بنصر ونور؟
ولا كما اللى فات ..رايح بدون أتمان؟
 
يا دم يا منقوش على اتوابى ..ومعطر الطرقات..
قلب الوطن يحيا ..بدمانا والهتافات...
يا بكرة يا ممنوع...غاب القصاص عننا..رغم الرصاص مسموع..
أمانة بس عليك أول ما تيجى تبان...تبان لى بالألوان..
واكتِب على الأحمر ...ده دم أحبابى ...اللى عشان تظهر ...
علّم على ثيابى...وعطر الميدان.

هبة بلال.
 

بكره ماجاش (بقلم هبة بلال)

ما بقتش حمل هموم وجذب ..وشد..
القلب شاخ..والدمع بات عالخد...
والشيلة لو شافها الجبل... يتهد... 
والعمر بعته للزمان .....ببلاش..!

مين اللى قال الحزن غية وكيف...؟
دى الدنيا عايشينها.. بحد السيف.....
والفرح لو عدى يعدى ....طيف ...
لا ف-مرة بنشوفه ولا بيتعاش....!!

يا ليل وايه آخر جراح القلوب...؟
ليه لازم الاحساس يبات مغلوب...؟
ليه الزمان بيمشّى بالمقلوب...!؟
والنار فى حضن القلب ما بتهداش...

يا قلب عايش  للقلوب ..والناس...
أخدت ايه من رقة الاحساس...
غير الهموم ...ومُرْ مُرْ الكاس...
والجرح علّم فيك وما بتقساش...

يا ليل طويل على كل قلب حزين..
قلبى وبكره كانوا ..متواعدين...
تاهوا ف-زحمة الليالى سنين..
القلب شاخ وبكره لسه ما جاش..

يا عُمْرْ عَدّى فات ف-لحظة ومَرْ..
الناس هنا أحلى حلاهم... مُرْ... 
ما بقاش يفيد الصبر ..بل بيضر!!
والقلب مات م-القهر ما اتهنّاش..

هبة بلال.

بلاد العُرْبْ (بقلم هبة بلال)

بلاد العُرْبْ قهرانى ودايسانى ونسيانى..
وبحلم لو تعود لينا ونرجع ليها من تانى..
بلاد العرب خذلانى وصايدة كل غزلانى..
وسايبة لى ذئاب ياما ..بتنهش فكرى وكيانى..
بلاد العرب مكلومة ..ومظلومة..ومحكومة..
وكلمة(لأه)ملغومة أقولها... يقطعوا لسانى...
بلاد العرب حبسانى..وصادرت كل ألوانى..
وسابت لى السواد لحداد ...ودمى الأحمر القانى..
بلاد العرب مكسورة..فى برواز باهت الصورة..
بقت حدوتة مغمورة.. فى حبة شعر وأغانى... 
بلاد العرب أغنية...وانا أسطورة مرمية...
تاخدنى الريح تدور بيا ...وكتر اللف أعيانى...
وبحلم لو تعود لينا ونرجع ليها من تانى....
هبة بلال

اخوان منافقون(بقلم هبة بلال)

أنتوا ايه غير ألف جاهل ...جوا توب العلم بانوا ألف عالم ..
ألف عقل بدون معالم..
ألف فتوى فى النخاسة والطهارة والنجاسة...
واما نوصل عند ساسة وحكم فى رد المظالم ..
تصبحوا ألفين حَمَلْ رغم النياب ..
يصبح المظلوم غنيمة من الغنايم..!!
أنتوا ايه غيرألف حالة وألف وش وألف لون..
ألف ليل من غير ملامح أو عيون ..
ألف كذبة ستفوها ..بالكراسى كتفوها ..
ألف كلمة بألف حرف مشكلينه...بالسكون..
واما حاولوا يحذفوها ..صابها فى لحظة الجنون..
أنتوا ايه غير ألف شرع وألف ملة وألف دين..
بير نفاق والكذب علّم فى الجبين..
ألف درس بجد مر..ألف ليل على كل حر..
ألف وهم معيشينا فيه سنين...
أنتوا ايه غير ألف سكة ..وكل سكة بألف فخ ...
ألف تعبان عالرقاب لفوا وبخوا السم بخ...
تقلعوا توب الدناءة..ترسموا طيبة و براءة..
تلعبوا دور الصداقة ...أو محبة ..أو جراءة..
الحقيقة كلكم فى الأصل مسخ..................
هبة بلال.

نفس اللعبة

نفس اللعبة ونفس الدور.. والشجرة لسه لها جدور..
والعسكر داير ما يدور.. عمال يدبح فى الثوار.. 
ودمانا رخيصة ومباحة ..
يقتل فينا بكل بجاحة عسكر ذل ..ومجلس عار
نفس اللعبةعلشان تعلا ..هلّب واجرى .. 
جهز شنطك واطلع دوغرى على لندن.. مش كامب شيزار..
نفس اللعبة لما يقوم الشعب (قوام)كام بلطجى على كام هجّام..
ويسيبوا علينا الاعلام ...وعين الغولة تطق شرار
نفس اللعبةمندسين وايادى خفية..واطراف تالته وغير مرئية..
وييجوا يقولوا عليك وعليا ...دول عُمَلا مش أهل الدار!!!
نفس اللعبة لما يحبوا يفضوا اللمة..يسحبوا منّا القوت واللقمة..
نص الشعب يقوم يتغمّى...ويدور فى الساقية دوار..
نفس اللعبة لما يحبوا يلّهوا الناس... يقتلوا أهالينا ف-قدّاس..
ولا يهدواكنيسة بفاس..لكن برضه يا مصر عمار..
نفس اللعبة مرة ولاد الايه اسفين..ومرة بنحبك يا (مشين)..
فاضل بقى طبل وبلالين......ويقوللك دول الثوااااار...
نفس اللعبة.. لمّا يحبوا يخوّفوا سايب.. يضربوا فى المربوط والغالب..
ما بيجنوش غير خوف ..ومتاعب..وغضب طالع زى النار..
نفس اللعبةعلقّوا مشاكلنا ف-صنارة ..لمذاهب سياسية حمارة..
المفروض تلبس نضارة..علشان توعى لحال الدار..!
نفس اللعبةمجلس عامل فيها حويط ..ومجلس تانى غشيم وعبيط..
والاتنين نازلين تخبيط ..مش عارفين ياخدولنا قرار..!
نفس اللعبة دم اخواتنا تمنه شريطة.. وملف مظبط تظبيطة !!
ضحكوا علينا خلق حويطة...للقاتل واقفين زنهار..!!
نفس اللعبة..وسيناريو دايما يتكرّر ..!!
نفس الدم ف-كل مكان ..نفس الموقف نفس المنظر..
نفس الشعب رجع يتهان..وبيتعذب وبيتكدّر..وبيضحك ويقول أقدار..!
واحنا هنلعب بقى لعبتنا أجمل لعبة ...ومش هنشيب ثورتنا لنخبة..
راجعين روحنا جريئة مشاغبة...وحالفين ماشيين المشوار.
هبة بلال.

محتاجالك

محتاجالك طفل عينة كل فرح الدنيا فيها 
طفل.. قلبه أخضر مندّى ..حاضن الدنيا وما فيها
ينده الاحلام بضحكة... ليه تلبى وهى ضاحكة
تترمى ف-حضنة ...وقلبه يترمى ف-جنة عنيها
محتاجالك.. تبقى بسمة فجر طالة شاقة جوف الليل وحزنه
تبقى طير... فارد جناحه واخد الدنيا ف-حضنه
محتاجالك... تبقى فجر ضياه بيرسم بالأمل بسمة شفايفى
نسمته الحلوة تعدى... بردها يلطّف ويشفى
تبقى فجر.. نداه برقة فوق خدود الورد ينزل 
وبحنان وبحب يغزل.. فوق خدود الورد لونه 
وبحنانه.. يصحى كل الورد ويفتح عيونه
محتاجالك.. تبقى صحبة ورد ضامة بين ضلوعها
وردتين ضامّين بشوقهم ورده حلوة لسه نونو
لسه بتفتّح عنيها وتلاقيها تبتسم ف-الدنيا تفرح 
يترسم للحب مطرح.. فى فؤادها وف-عنيها
محتاجالك أبقى دمعة ..أتولد ف-احضان عنيك 
عمرى اعيشه فوق خدودك.. يروى قلبى شوق ورودك
يهدى عمره كله ليك..
تهلك الروح فوق شفايفك .. دايبة م-الاشواق اليك..
مهما تبعدنا دروبنا..الحنين يأسر قلوبنا ..
يبقى نبض القلب شايفك..لهفته تنده عليك..
محتاجالك كون يساعنا..
محتاجالك ألف كلمة وألف معنى..
محتاجالك فوق ما راح يخطر ببالك.
هبة بلال
 
 
 

الصحبة

يا محلا الصحبة واللمّة..فى حضن الأهل..
وسهرة حلوة نخطفها..وضحكة م-القلوب تطلع..
تقول للعمر فوت على مهل...
فى لمحة الوقت ..يسرقنا..ودنيتنا تفرّقنا....
وعارفين الفراق مش سهل...
وروحنا تتخطف منّا.. ندارى الدمع ف-عيوننا,ونتألمّ..
تتوه الكلمة واحضاننا اللى تتكلم.........
وغصبن عننا دموعنا بتنزل تجرى وتسلمّ..
ونتفارق وفى ِوِْداعنا ..نبان خايفين...
ما نعرفشى هنرجع ولاّ مش راجعين.!!
هبة بلال
 

حقك عندى

حقك تزعل لما اخبى عنّك حبى..
واما أخبّى شوقى وعشقى جوا ف-قلبى..
حقك اصالحك ..وانى أصارحك ..
باللى ف-قلبى واللى ف-بالى...
حقك انك تعرف ايه بيدور ف-خيالى..
حقك انك لو يوم تجرح..انى أسامحك..
وارجع تانى اتهجى ملامحك..
فيزيد عشقى لما ألاقى شوقك ساكن حضن عيونك..
واما ألاقى قلبك يغزل توب قلبى من نبض حنينك..
حقك عشقك يجرى ف-دمى ويصنع ذاتى..
حقك تبقى حبيبى وتبقى صديقى واخويا وكل حياتى..
حقك تبقى الخيط الفاصل جوا حكايتى..
تبقى الفارس.. تبقى الحارس تبقى مرايتى..
حقك مهما تكون الناس حواليّه..تبقى ف-قلبى..
وانك لمّا تقول مشتاقلك ..أصرخ واعلن شوقى وحبى..
حقك انك كل ما تغزل حلم ف-بالك احققهولك..
وانك لمّا بايدك ترسم شئ ف-خيالك أكملهولك..
حقك انى اشتاق لك دايما" وانت ف-قربى
 وانى اشتاق ف-بعادك عنى..
حقك تبقى رغم البعد قريب منى..حقك انى..
اعشق نور الدنيا ف-عينك..
حقك انى..لو يوم المح شمس جبينك..
الروح تجرى لجل تقابلك..توصل قبلك..
والأشواق تتسابق يمك..
والعين تسبق روحى وشوقى لجل تضمك..
حقك قلبى يجرى بشوقه ..ويحضن قلبك..
حقك انك..لمّا جميع الناس تغدر بك أفضل جنبك..
وانا من حقى انك تعرف..انى ب ح ب ك .
هبة بلال
 
 

سنين

سنين دايرة على كيفها..وطالقه عالعباد السيف يدورفينا..
لا قادرين احنا ننصفها.. ولا عارفة ترسينا..
سنين واحنا بنتسابق..بنجرى والزمن سبّاق خطاوينا..
وف-الزحمة..بنتفارق ..وتفضل بين لقا وفراق تدور بينا..
تتوه الخطوة م-السكة.. تتوه الصحبة والمرسى..
وفوق أرض البعاد نرسى.. ما نلقى ايدين تعدينا..
ما نسألشى عن الأسباب ..عشان الدنيا لاهيانا فى ألف عذاب ينسينا..
سنين ..عايشانا ونقاوح كتير فى طبعها الجارح..ندور فيها ..تدور فينا..
وتكتبنا ف-صفحتها وتاخدنا غياب..وتدينا أمل كداب يهد الحب بادينا..
سنين دايره... وأيامنا سفينة تايهة فى المينا..
ونيجى نعدل الدفة..فتستعفى على ايدينا...
تتوهنا ...تحزننا ...ما تستكفى من الحزن اللى فى عنينا..
نتوه فى زحمة الأيام.. تضيع منا ملامحنا ..لسنين قدام..تتوه فينا..
يعدى العمر قدّامنا..نقول له لسه لا فرحنا ولا رسينا...
ونتحسر على روحنا ..ما نعرف باعت الدنيا لمين.. وبكام.. ليالينا.
 هبة بلال.

أحوال

ضحكم علينا بتحية..وشريطة حداد..
و(رصيدنا يسمح)-اسم الله -وحكموا الأوغاد..
وشبابنا صارت منسية ضمن الأعداد..
لكنى حالف يا بلادى ..هاخد بالتار..
اللى رفض يقتل ناسه ...واخد تكدير..
واللى دهسنا -ببيادته -رقوه لمشير..
واللى مايدركش الفروقات يا اهبل يا ضرير..
فرق مابين مجلس نازى وبين الاحرار..
اللى رووا الأرض الطاهرة بدم -هدية-
وغزلوا توب الحرية... ليكوا وليه.. 
بقواقلة مندسة غبية ..مستعصية .. 
وعلمانيين على حبة ..كفرة..وأشرار..
بوق النظام يطلع يفتى عن كل شهيد
يقول دا بلطجى -متموّن- سابقة ورعديد..
وكل خارج عالحاكم أو قال له نريد..
-ومات- لا هوا من الشهدا ولا م-الأبرار..
واللى طلع على دم الناس..مسك الدفة.. 
حرباية ماشية مع التيار.. كداب زفة.. 
اهو كل لحومهم ورماهم عضم ف-أفة..
والس مع اللى سرق روحنا وقال لنا (أعمار)..!!!
ملعون أبو الليل والعتمة والخوف والذل..
ملعونة كلمة ما تتقالشى  قدام الكل..
 ملعون يا فجر ان ما طلعتش ..ورضيت تتغل
ملعون يا بايع دم اخواتى بالاستغفار..
هبة بلال.

مشايخ

طول عمرى اقول عنك طيب ومن الابرار
والدقن كانت يا مشالله هيبه ووقار
وايديك بتسبق بالخيرات كدا باستمرار
طول عمر ى اقول اللى اتعذب يشعر بالنار
بس البعيد قلبك جاحد وبدون اعذار
ولما فرعون يتفرعن يجى الأرعن ويقول شطار
طول عمرى اخاف قولة العيبة وارعى الاحساس
واحفظ لسانى من الغيبة وأعوذ بربى من الوسواس
لكنى ببعت برساله لجبان بميت وش وحالة
افكاره فاضيه وبطالة وزعيم الكار
مقدرش اقول مين في الجنة او مين فى النار
بس الاكيد بقى يا جماعة شوم وجياعى كلكوا كفار
هبة بلال

صديقى

أول ما تضيق ..بشتاقلك أوى يا أعز صديق..
بشتاق لعنيك تبرق م-الفرحة اما تشوفنى..
لجرائتك ...م- الخوف تخطفنى..
بشتاق للضحكة اللى تنور ليل المساجين..
لايديك بتطبطب على كتفى وكتف التانيين..
ولغنوة انا وانت سمعناها ورددناها ف-قلب الميادين..
معقول من سنة كنت بتهتف هنا فى التحرير؟
معقول سبتنا؟؟ مش كنت بتحلم بالتغيير..؟
واهو صاد الحلم رصاص قناص غدار وضرير...!.!
مشتاق لك أوى...
واشتاقلك كل مكان وميدان ..خطيته بقدمك مره زمان..
وصرخت بعلو الصوت (ثوار..أحرار هنكمل ميت مشوار)
باتمنى اشوفك فى مظاهرة ..أو ماسك علمك وبتهتف ضد الطغيان..
واتمنى اسهر وياك سهرة.. وأقوللك والله يا صاحبى زمان..
باتمنى أكمّل حلمى معاك... بتمنى  وحلمى بيستناك..
واتمنى اشوفك نصر بلدنا المحبوسة ..  
وأشوفك فرح عريس يتزف على عروسة..
وأشوفك نور بيعدينا على بكره الجى...
واشوفك احلام محسوسة... وأشوفك حى..
مع ان دماك لسه ف-حضنى..
مشتاق..وايامك وحشانى..وكلامك بيرن ف-ودنى..
ارجع نتصاحب من تانى ..... ارجع خدنى.

هبة بلال
 

بتحبها

بتحبها.......
وعين بتعلن عشقها
والقلب لمّا يلمح الطيف -من بعيد-يجرى عليه ويروح لها..
واما بيوصل عندها يبقى سعيد..يبعد بعيد..
عن اى حزن عشان بيبقى ....جنبها
واما بتوصل للمكان ..بتقوم لها...تتبسموا..
وتسلموا ...تتكلموا عن حالك انت وعنها..
وتخاف تبص الناس عليك ساعة عنيك ..ما تضمها..
وقت الرحيل..بتسلموا وتضحك لها..بعد الرحيل..تشتاق لها..
تتمنى لو مرت عليك..تلقى عنيك تجرى تدوّر عنّها..
واحنا نراقب من بعيد قصة هواك..
وانت بتحلم لو تشوف وش الملاك ..
حتى ولو لحظة وحيدة بعدها ييجى الهلاك...
فجأة............. بتلقاها هناك..واما عنيها تلمحك..
تتبسموا... تتلعثموا ..وتسلموا تانى وعنيك تضحك لها..
ويحل صمت.....ساعات تفوت..ومن السكوت ..
تخجل ونسمع نبضها......
ونشوفها لما تكون معاك....  عصفور ودايب م-الخجل ..
قدام عنيك ..قلبه ارتجل أجمل قصيده..سمعتها...
وانت تدوب فى عشقها....وتتوه فى كامل حسنها..
مالك كده سارح ف-ايه؟......
ما تقول لها.......ب ت ح ب ه ا .
هبة بلال.

الحزن

الحُزن ْبِذرة صغيرة وبتترمى ف-قلب البشر..
وامّا بتحضنها الدموع..تطرح شجر..
يضرب جدوره جوا أحضان القلوب..
وبيتولد مليون ألم ...ميت آهه ماليها الندم..
وبتنطلق ناوية الرجوع...
تبقى بحور اليأس دم,,يبقى فى قلب القلب هم..وملحمة..
تلقى السما...مقتولة ف-احضانها النجوم...
وبتتولد فى الكون ..غيوم..
والليل بيطرح فى هموم.. والهم مش عاوز يفوت..
الحزن بذرة ما ترويهاش.. عتلشان تموت..
الحزن مش لازم يدوم ..لو حتى ...يوم.
هبة بلال

الطلبة

احنا الطلبة نبض الشعب.....صورته الحلوة وصوته العذب.
احنا النور فى العتمة المرة ...واحنا الثورة ف-ساعة الكرب.
احنا الروح لبلادنا الحرة... واحنا النصر فى وقت الحرب.
احنا الطلبة ضد الظلمّة .....وضد الناس الغاويين كذب.
احنا الطلبة نرمى بذورالخير.. فى الأرض ونزرع حب.
نحصد من أهالينا محبّة ....ومن حكّامنا وجع القلب.!!
لينا حقوقنا ولو يوم دقنا ؛منها..شوية ..نشوف الغلب.
احنا الطلبة....
توهنا ..فوقنا..رفضنا..وافقنا..بيغدروا بينا ومن غير ذنب.!!
هبة بلال.

غربة

كلنا ..عايشين فى غربة..وف-بلادنا الغربة صعبة ..
كلنا ساكنين ؛فى خوفنا ..وف-بلادنا القهر محاوطنا ولاففنا..
لو نخطى كدا يدوب ..على أد شوفنا..
رغم خيرنا.........الا انه سارقه غيرنا..
واحنا ما بنملكش حاجة تبل جوفنا..
حتى صمنا عن كلامنا ..رغم انا مظلومين..
رغم ان الحق قايل(مين سكت عالحق متشيطن لعين..)
ليه بنرجع تانى نسأل؛ ذنبنا، أم ذنب مين؟.. 
ذنب خوفنا؟ ولاّ دى هىّ ظروفنا؟..
ذنبنا أم ذنب مين؟.. ليه نعيش مستسلمين؟..
احنا عايشين فى البلد نزرع..نخضر..
ترتوى الأرض بعرقنا ..وبدمانا يتولد الزرع الأخضر..
واحنا اللى من بشاشة وشنا الفجر نوّر..
والأشاوس جم وسلبوا الفجر نوره ..
سفكوا دمعى قلعوا زرعى من جدوره..
سرقوا بلدى ..لم يخلّوا حتى حتة من صخوره..
وادى حالنا فى البلد دى.. الكبير دايما بيكبر..
والصغير تحت رجلين الأباطرة يصغر أكتر..
بس مهما الظلم يكبر.. برده ربك عالكبير اكبر.. وأكبر.
 هبة بلال.
 

الشعب المصرى

يجوز هوا حِشَرى...ولَكِنُه  عِشَرى ..
وطيب وقلبه ف-بياض الحمامة...
وبيحب يضحك مع انه دايما..أحزانه عامله ف-عينه اقامة..
مع حس ثومة لما تغنّى ..بتلقاه  بيصبح فى اللحن نغْمَة..
مع نجم وامام لما بيحكوا لمصر.. ولخالد.. وعزة ..وسلمى..
عن الحبسخانة..وعن سكة ضلمة.. وعن قهر دايم وعن دنيا ظالمة..
بيبقى مناضل قضى كل عمره فى قلب القضية.....
مايعرفشى ايه راح تخبى  وراها ساعاته اللى جاية..
يشوف دم اخوه اللى فى القلب  سايل ...
يثور...يهزم الخوف ..يجيب البشاير..
 يجيب تاره من بين نياب الأسود...وبعدين يعود..
وويا رفاقُه -فى الشدّة- يبقى زعيم الفوارس...
يحس انه حارس؛ لمصر.. وولادها ليوم القيامة..
ويصحى من الحلم لا يلاقى ...حريّة ولاّ كرامة..
وترسى الحكاية على سجن حربى ..
وحبسة وقواضى.. ويمكن غرامة ..
ورغم اللى حاصل مصمم يواصل..
ولا يحده فاصل.. ولا يصده سد..
ولا يحوشه عن حلمه..كلمه لحد..
وحالف هيوصل لغايته ..بسلامة... 
ولو حتى حارب ليوم القيامة.
هبة بلال

انتوا مين

أنتوا فين؟ ياللى بعتونا ؛سنين..
ياللى عشتوا مْسَلِمينْ مستسلمين..
قام جميع الشعب ثاير؛..كنتوا فين؟..
والشباب دا دمه سايل لجل مين؟..
كله قايم لجل يبنى الوطن ..لابنك ولابنى..
وانتوا رغم النصر لسه مهزومين..
لسه جوا الاسر..وانتوا محررين..
انتوا عشتوا العمر كله فى خضوع..
واحنا متنا مرمطة..وحرمان..وجوع..
احنا اخترنا طريق مفيهوش رجوع..
الا واحنا عالفساد دا.. منصورين..
وانتوا عيشوا.. بالغباء.. متقيدين..
يا وطن ..الكل بان..
اللى صان ..بالدم وطنه .. واللى خان..
اللى قال للظلم لأه .......والجبان..
اللى صاين ..عرض وطنه..والقضية من زمان..
نبض ثورتنا ينادى.......آآآآآآآآآآه يا كل الديوثين..
داروا كل وشوشكوا عنّا .. شكلكم بقى شئ لعيين .
هبة بلال
 

المنادى

أعْلنْ وَالى بلادْنا الحُرَة ْ..اِن الثورَةْ خَطأ ُُُ ُ فادِح ْ..
يعنى مًُضِرَةْ..
لِذا قررنا..نِقطعْ كُلْ لسانْ ..بيقولْ ..
وبيفضَح أيها مَسْئولْ..وبْأحزانْ الناس مشغولْ..
والقيادَات أسفة ..ومُضْطرَةْ!!!!!!!!!
وعشان أبقى معاكوا صَرِيحْ..
جَاءَ مَعالى سيادة الوالى بحَل مُريحْ...
{نَظَرا" للوَضعْ المُنْهار؛اللى عاملينه الثُوارْ..}
{وعَشانْ الخَيّة المنصوبَة  "لينا" ودَفعا للأضرار..}
أخَذَ معالى الوالى قَرار:
بِما انّ بلادْنَا مَلْيانَةْ..أطرَاف تالته كْتير وخْيانَةْ..
هنلِمْ الكلْ فْ-زنْزانَةْ ونجيب شَعْبْ مُطيعْ من ْ بَرَهْ..
هَذا حِفاظا" على سَلامتكم وايمَانا" بأرائنا الحُرَةْ.
هِبَةْ بِلالْ.

رسالة فقير

يا أيها المتعففون,حيالنا.. نطقت حجارة أرضنا
فى حين أنتم.... فى سباق للسكات ....
والى متى سنظل نحيا..كى نؤول الى الممات؟
والى متى سنظل نبحر؛ فى ليال مظلمة..
فى ذكريات مؤلمة؛ ونتيه فى بحر الرفات..
فمتى يفيق النائمون.... من الثبات؟ 
يا غارقين بكذبكم...هيا أفيقوا كى ترونا 
نرتعد............. بردا بأحضان الشتاء!!
 حتى ترونا ...لا نجد ثمن الهواء!!
فى حين أنتم عندكم............
لا تشترون سوى القصور..والعطور..والنساء..
لا تعرفون سوى الشراب..والجوارى..والغناء..
لا تعبدون سوى الدراهم..- يا كبار الأدنياء-..
يا غارقين بوهمكم..غاروا على أعراضكم..
غاروا على دم الشهيد..على بقايا عزكم
غاروا على أرض تنادى (حررونى انما أنا أمكم)..
يا غارقين بوهمكم .. لالاتغاروا ..ولا تفيقوا....
انه...قد حان وقت هلاككم.
هبة بلال

كاذبون

أيوه طبعا" كاذبون..من دمانا تشربون
تسكروا..تترنّحون..وببلادنا تلعبون..
وبايديكوا الطاهرة دية..توصّلونا للجنون..
يبقى طبعا" ..ألف طبعا" كاذبون..
لما نستأمن ضميركم ؛عالحقوق..
 ما نلاقيش غير خطبتين ..وسلام ..وبوق
وكعكة حلوة ..واللى نفسه يدوق يدوق..
واللى بدأوا....من البداية يبدأون..
يبقى طبعا" ألف طبعا" كاذبون..
لمّا توعدنا القيادة ...بالأمان!!
تتقلب أيامنا.. ألعن من زمان!!!
لجل يترحّم ضعيفنا عاللى كان..
وف-جدودنا...الغلابة يلعنون..
يبقى طبعا" ألف طبعا"كاذبون..
لما تتبرّوا بخساسة من ..الضمير..
وامابيكون (الملك)عامل...أسير..
واما تنضرب التحية..لل(أمير)...
والجميع على خشبّة واحدة يمثلون...
والحقيقة يأمروكم...تؤمّرون..
يبقى طبعا"... ألف طبعا" كاذبون..
لما أخ برتبته... يقتل أخوه..!!
واما شعب بمكركم...عمّال يتوه..
واما فجر بكل خسة... تكبّلوه..
 واما بتصيدوا الأمل جوا العيون..
يبقى طبعا" ألف طبعا"كااااااذبون...
بس يا صحاب السيادة احنّا بكرة عائدون.
هبة بلال
ملحوظة:(الملك والامير) وصف لما هما عليه.

رسالة العسكرى فى عيد الثورة

يا اهل ثورتنا الحبيبة,يا أفاضل ...ياكرام..
بعد شوقى الجم ليكوا..والتحية..والسلام..
أنا عالبلد باعت هدية., للصبية ..والغلام..
باعت الدانات اليهم..رمز شوقى للسلام..
ومولوتوف..وحجارة ..لكن كلهم اخر تمام..
كل دا ينزل عليهم .,كل ليل..والناس نيام..
والرصاص الحى جاهز .,واحنا مش عاوزين علام..
بس تحذير منى ليكوا..وللغلام ,والصبية..
لو خطر ليلة فى بالكوا..ترفضوا قبول الهدية..
 يومها أزعل..وانتوا عارفين ان زعلى..ريح عتيّة..
وان زعلى ..مش مجرد طلقة حية ..وبندقية..
وانتوا حافظين الحكاية.. وكل أوراق القضية..
بس بوعدكم بشرفى..وبدماكوا اللى ف-ايديا..
وعد منى؛وانتوا عارفين ان وعد الحر دين..
لو رضيتوا بالهدية...زى كل الطيبين..
المشير حالف ليبنى؛ليكوا أجمل تربتين..
وانتوا عارفين القيادة ..لما تبنى تبنى زين..
سخن ساقع لو تحبوا.. مش مجرد تربتين..
فاقبلوا بذوق الهدية..او نخللى حياتكوا طين..
والكلام أخره الختام ..واحنا بالله نستعين.
هبة بلال.

الثورة

انفخ فى بوق الثورة, واجرى,وانتفض..
واصرخ..ماعادشى الصوت هايرضى يترفض..
انفض غبار الذل عن كل الوشوش..
وارفع جباه الخلق فوق كل العروش..
زلزّل جبال الظلم يلا.. بكلمتك..
الكلمة سيف..والفكرة سهم ف-جعبتك..
اوعّاك فى يوم تضعف,وتكسر..همّتك..
اهدم صروح الفاسدين..اوعاك تخاف.. 
واعلن برغم المفسدين,هنعيش نضاف..
متوحدين..مبقاش مكان للاختلاف..
كل الايدين متجمعّة...ملعون يا كل امعة أعمى ما شاف..
يا شعب عاش مقهور سنين.,خليّك عفىّ..
خليك جرئ...اوعى شموعك تنطفى..
شيّد ممالك عزتك..وبقوتك..تبتّ على حريتك..
ابنى بلادنا بهمّتك..واهدم بيوت..العنكبوت..المختفى..
هبة بلال

الكريسماس

كل كريسماس وانت بخير, دايما" قادر..عالتغيير..
ترمى ف-حضن الأرض محبة...تجنى ايديك النور,والخير..
تبقى لكل الأمة أطبا , تشفى جروحها,... مهما يصير..
 لو فكرّت العتمة تطوّل....تغزل فجر, يفوح بعبير..
كل كريسماس..واحنا فى بيتها,وانت والدنا,واحنا ولادها..
نهتف باسمها,واحنا بنعجن...أجمل حنة.. من تربتها..
نشرب شهد النيل ف-كفوفها...ونكحّل عينّا بحلاوتها.. 
كل كريسماس..وانت مابينّا...حاضنين جوا قلوبنا وطننا..
صامدين سوا فى النار..والجنة..مهما تكون فيه ناس تاعبينّا..
ماشيين سكة شوك..لآخرها...على مشوارها المولى يعينّا..
هبة بلال