مقارنة

ان كنت حر بجد وبقلب مستبيَع
اوعاك تجيب فراعين مع بعض ف_مقارنة
لا اللى جلد ضهرنا أقل كان أجدع
ولا اللى زاد العدد قلل فى أعمارنا
كل الفراعنه من نفس الرحم نازلين
راضعين غبا وجحود وارثين أنانية
البطن قلاّبة ودول خلفة غراب البين
فيها التسلّط وبا.... واخده الغرور غيّة
والظلم نار ان طال ولاّ قصر زمنه 
والغولة عينها شرار لو كارهه أو حابه
واللى يفضل غول عن غول عشان آمنه
يلقى النهاية أكيد كحكاية الدبة
مهما الربيع يختفى ويحط ألف خريف
لا الشمس يوم تنطفى ولا التراب يلمع
والحر ما بيقبلش القيد ولا التخويف
مهما طريقك صِعِبْ اوعاك ف-يوم ترجع.
هبة بلال  

انسان

أنا مش برواز ...
مش صورة وخيط وخشب وقزاز
أنا روح من نور..وغرام مبدور
والقلب يفيض عالدنيا حنان

أنا حلم منّبت من فكرة
ومفرّع على جدران بكرة
فارد ضله  عالكون كله
ومتبّت جدره ف-أرض ريحان

أنا قلب جرئ ..
وشعاع بينوّر سكة ف-ليل حالك وغميق
أنا أول خطوة ف-كل طريق
تتجمع فيه كل الألوان
من غير أنا مين... وأنا ايه... وأنا فين
أصل أنا انسان.

هبة بلال.