باب العاج

أنا كل يوم باجى لبابك العاجى
من دمعى بتوضى
واخبط بكف الروح على قلبك الفضة
قومى افتحى بابك
لو يمضى عمرى أنا..واقف على اعتابك
علّ الفؤاد يرضى
ويسمح انى ف يوم أدخل لمحرابك
وابقى يدوب ناسك
درويش وعاشق غنا عايش بإحساسك
يا نجمة يا ام الضيا 
ياللى القمر باسك ووهبتى ليه بسمته 
من عطر أنفاسك
يا ام العيون طاللين شمس وقمر مكسوف
طلة بعين الرضا لجلن عيونى تشوف
واغسل عيون الروح بضيك الوهاج
يا ام الحنان أمواج برد الشتا قتال
نظرة دفا لله من فيضك السيال
عاشق بقالى كتير يا ام القليب فضة
واقف بباب العاج وكل ما اتوضى
انظر اليكى واتوه
وانا قلبى مش معتوه بس الهوى قادر
علم فى قلبى قوى والقلب مش قادر
لكن مسير سكته يظهر لها آخر
واهو برضه بيعافر. 
هبة بلال
 

انا موجود (اهداء لكل ذوى الاحتياجات الخاصة)

أنا مش ضل 
ولا لوحة بتللون بكيف الكل
أنا إنسان بروح بتطل م-القلب اللى متشايش
مناها تعيش وتتعايش
فتلقى نفسها (بذهول)
يدوب حبة ورق بايش
مجرد شئ على الهامش
ومتكبل بنظرة طالله كالسجان
وحواليا السكوت قضبان
وانا مهما حصل انسان
ورافض إنى اكون عالرف للعوزة
ورافض انى اكون طايفة ومنبوذة
مانيش عاجز ولا عالة
ولا يمكن أكون حالة
لطيف بيمر مش ظاهر ولا معدود
انا انسان بروح وكيان ومن حقى أكون موجود
مانيش طالع فى دور سنّيد
دا انا مارد ومالك صك أحلامى
فمد اللإيد
حياتنا ملك أرواحنا ماهياش هيئة وأسامى
إيديك فى إيديا هننور طريق بكرة
ونزرع فى القلوب فكرة
ونفتح ميت طريق مسدود 
انااااااااا موجوووووووووووود.
هبة بلال