الصحبة

يا محلا الصحبة واللمّة..فى حضن الأهل..
وسهرة حلوة نخطفها..وضحكة م-القلوب تطلع..
تقول للعمر فوت على مهل...
فى لمحة الوقت ..يسرقنا..ودنيتنا تفرّقنا....
وعارفين الفراق مش سهل...
وروحنا تتخطف منّا.. ندارى الدمع ف-عيوننا,ونتألمّ..
تتوه الكلمة واحضاننا اللى تتكلم.........
وغصبن عننا دموعنا بتنزل تجرى وتسلمّ..
ونتفارق وفى ِوِْداعنا ..نبان خايفين...
ما نعرفشى هنرجع ولاّ مش راجعين.!!
هبة بلال
 

حقك عندى

حقك تزعل لما اخبى عنّك حبى..
واما أخبّى شوقى وعشقى جوا ف-قلبى..
حقك اصالحك ..وانى أصارحك ..
باللى ف-قلبى واللى ف-بالى...
حقك انك تعرف ايه بيدور ف-خيالى..
حقك انك لو يوم تجرح..انى أسامحك..
وارجع تانى اتهجى ملامحك..
فيزيد عشقى لما ألاقى شوقك ساكن حضن عيونك..
واما ألاقى قلبك يغزل توب قلبى من نبض حنينك..
حقك عشقك يجرى ف-دمى ويصنع ذاتى..
حقك تبقى حبيبى وتبقى صديقى واخويا وكل حياتى..
حقك تبقى الخيط الفاصل جوا حكايتى..
تبقى الفارس.. تبقى الحارس تبقى مرايتى..
حقك مهما تكون الناس حواليّه..تبقى ف-قلبى..
وانك لمّا تقول مشتاقلك ..أصرخ واعلن شوقى وحبى..
حقك انك كل ما تغزل حلم ف-بالك احققهولك..
وانك لمّا بايدك ترسم شئ ف-خيالك أكملهولك..
حقك انى اشتاق لك دايما" وانت ف-قربى
 وانى اشتاق ف-بعادك عنى..
حقك تبقى رغم البعد قريب منى..حقك انى..
اعشق نور الدنيا ف-عينك..
حقك انى..لو يوم المح شمس جبينك..
الروح تجرى لجل تقابلك..توصل قبلك..
والأشواق تتسابق يمك..
والعين تسبق روحى وشوقى لجل تضمك..
حقك قلبى يجرى بشوقه ..ويحضن قلبك..
حقك انك..لمّا جميع الناس تغدر بك أفضل جنبك..
وانا من حقى انك تعرف..انى ب ح ب ك .
هبة بلال
 
 

سنين

سنين دايرة على كيفها..وطالقه عالعباد السيف يدورفينا..
لا قادرين احنا ننصفها.. ولا عارفة ترسينا..
سنين واحنا بنتسابق..بنجرى والزمن سبّاق خطاوينا..
وف-الزحمة..بنتفارق ..وتفضل بين لقا وفراق تدور بينا..
تتوه الخطوة م-السكة.. تتوه الصحبة والمرسى..
وفوق أرض البعاد نرسى.. ما نلقى ايدين تعدينا..
ما نسألشى عن الأسباب ..عشان الدنيا لاهيانا فى ألف عذاب ينسينا..
سنين ..عايشانا ونقاوح كتير فى طبعها الجارح..ندور فيها ..تدور فينا..
وتكتبنا ف-صفحتها وتاخدنا غياب..وتدينا أمل كداب يهد الحب بادينا..
سنين دايره... وأيامنا سفينة تايهة فى المينا..
ونيجى نعدل الدفة..فتستعفى على ايدينا...
تتوهنا ...تحزننا ...ما تستكفى من الحزن اللى فى عنينا..
نتوه فى زحمة الأيام.. تضيع منا ملامحنا ..لسنين قدام..تتوه فينا..
يعدى العمر قدّامنا..نقول له لسه لا فرحنا ولا رسينا...
ونتحسر على روحنا ..ما نعرف باعت الدنيا لمين.. وبكام.. ليالينا.
 هبة بلال.

أحوال

ضحكم علينا بتحية..وشريطة حداد..
و(رصيدنا يسمح)-اسم الله -وحكموا الأوغاد..
وشبابنا صارت منسية ضمن الأعداد..
لكنى حالف يا بلادى ..هاخد بالتار..
اللى رفض يقتل ناسه ...واخد تكدير..
واللى دهسنا -ببيادته -رقوه لمشير..
واللى مايدركش الفروقات يا اهبل يا ضرير..
فرق مابين مجلس نازى وبين الاحرار..
اللى رووا الأرض الطاهرة بدم -هدية-
وغزلوا توب الحرية... ليكوا وليه.. 
بقواقلة مندسة غبية ..مستعصية .. 
وعلمانيين على حبة ..كفرة..وأشرار..
بوق النظام يطلع يفتى عن كل شهيد
يقول دا بلطجى -متموّن- سابقة ورعديد..
وكل خارج عالحاكم أو قال له نريد..
-ومات- لا هوا من الشهدا ولا م-الأبرار..
واللى طلع على دم الناس..مسك الدفة.. 
حرباية ماشية مع التيار.. كداب زفة.. 
اهو كل لحومهم ورماهم عضم ف-أفة..
والس مع اللى سرق روحنا وقال لنا (أعمار)..!!!
ملعون أبو الليل والعتمة والخوف والذل..
ملعونة كلمة ما تتقالشى  قدام الكل..
 ملعون يا فجر ان ما طلعتش ..ورضيت تتغل
ملعون يا بايع دم اخواتى بالاستغفار..
هبة بلال.

مشايخ

طول عمرى اقول عنك طيب ومن الابرار
والدقن كانت يا مشالله هيبه ووقار
وايديك بتسبق بالخيرات كدا باستمرار
طول عمر ى اقول اللى اتعذب يشعر بالنار
بس البعيد قلبك جاحد وبدون اعذار
ولما فرعون يتفرعن يجى الأرعن ويقول شطار
طول عمرى اخاف قولة العيبة وارعى الاحساس
واحفظ لسانى من الغيبة وأعوذ بربى من الوسواس
لكنى ببعت برساله لجبان بميت وش وحالة
افكاره فاضيه وبطالة وزعيم الكار
مقدرش اقول مين في الجنة او مين فى النار
بس الاكيد بقى يا جماعة شوم وجياعى كلكوا كفار
هبة بلال

صديقى

أول ما تضيق ..بشتاقلك أوى يا أعز صديق..
بشتاق لعنيك تبرق م-الفرحة اما تشوفنى..
لجرائتك ...م- الخوف تخطفنى..
بشتاق للضحكة اللى تنور ليل المساجين..
لايديك بتطبطب على كتفى وكتف التانيين..
ولغنوة انا وانت سمعناها ورددناها ف-قلب الميادين..
معقول من سنة كنت بتهتف هنا فى التحرير؟
معقول سبتنا؟؟ مش كنت بتحلم بالتغيير..؟
واهو صاد الحلم رصاص قناص غدار وضرير...!.!
مشتاق لك أوى...
واشتاقلك كل مكان وميدان ..خطيته بقدمك مره زمان..
وصرخت بعلو الصوت (ثوار..أحرار هنكمل ميت مشوار)
باتمنى اشوفك فى مظاهرة ..أو ماسك علمك وبتهتف ضد الطغيان..
واتمنى اسهر وياك سهرة.. وأقوللك والله يا صاحبى زمان..
باتمنى أكمّل حلمى معاك... بتمنى  وحلمى بيستناك..
واتمنى اشوفك نصر بلدنا المحبوسة ..  
وأشوفك فرح عريس يتزف على عروسة..
وأشوفك نور بيعدينا على بكره الجى...
واشوفك احلام محسوسة... وأشوفك حى..
مع ان دماك لسه ف-حضنى..
مشتاق..وايامك وحشانى..وكلامك بيرن ف-ودنى..
ارجع نتصاحب من تانى ..... ارجع خدنى.

هبة بلال